പടിഞ്ഞാറത്തറ:പതിവ് തെറ്റിയെത്തിയ ശക്തമായ മഴയില്‍ പടിഞ്ഞാറെത്തറ കുറുമണി പാടശേഖരത്തില്‍ ഹെക്ടര്‍കണക്കിന് നെല്‍കൃഷിയില്‍ വെള്ളം കയറി.ബാണാസുര ഡാം ഷട്ടറുകള്‍ തുറക്കുന്നതിന് മുമ്പ് തന്നെ കൃഷിയിടത്തില്‍ വെള്ളം കയറിയതോടെ ആശങ്കയിലായിരുന്നു കര്‍ഷകര്‍. കുപ്പാടിത്തറ കുറുമണി ചെമ്പകച്ചാല്‍, കൊച്ചുകുളം എന്നീ പാടശേഖരങ്ങളിലുള്‍പ്പെട്ട 100 ഏക്കറോളം വരുന്ന നെല്‍പാടത്താണ് ഇന്നലെ രാവിലെ മുതല്‍ വെള്ളം കയറിത്തുടങ്ങിയത്. കഴിഞ്ഞ ദിവസങ്ങളിലുണ്ടായ തുടര്‍ച്ചയായ മഴയില്‍ കബനിയിലേക്കുള്ള നീരൊഴുക്ക് ക്രമാതിതമായി വര്‍ദ്ധിച്ചതോടെയാണ് തോടുകളിലൂടെയും ചെറുപുഴകളിലൂടെയും പാടശേഖരത്തിലേക്ക് വെള്ളം കയറിയത്.
