കെജിഎഫ് 2ന്റെ ട്രെയിലർ വിവിധ ഭാഷകളിൽ റിലീസായി മണിക്കൂറുകൾക്കകം തന്നെ റെക്കോർഡ് കാഴ്ചക്കാരുമായി യൂ‍ട്യൂബിൽ വൈറൽ ആവുകയാണ്. വമ്പൻ വരവേൽപ് തന്നെയാണ് ചിത്രത്തിന്റെ ട്രെയിലറിന് ഇപ്പോൾ ലഭിക്കുന്നത്. നിലവിൽ അഞ്ച് മില്യണിലധികം കാഴ്ചക്കാരുമായി കെജിഎഫ് മലയാളം ട്രെയിലർ യൂ‍ട്യൂബിൽ ട്രെൻഡിങ് നമ്പർ വൺ ആയി കുതിക്കുകയാണ്.
ഗംഭീര വരവേൽപ്പ് തന്നെയാണ് ചിത്രത്തിന്റെ ട്രെയിലറിന് മലയാളികൾ നൽകിയത്. കന്നഡ വേർഷൻ നിലവിൽ പതിനേഴ് മില്യൺ കാഴ്ചക്കാരുമായിട്ട് മുന്നേറുകയാണ്. തമിഴ് വേർഷനാവട്ടെ പതിനൊന്നു മില്യൺ വ്യൂസിലേക്ക് അടുക്കുന്നു. ഏറ്റവും കൂടുതൽ കാഴ്ചക്കാരുമായി റെക്കോർഡ് ഇട്ടത് ഹിന്ദി പതിപ്പാണ്. നിലവിൽ മുപ്പത് മില്യണിലധികം കാഴ്‌ചക്കാരെയാണ് ഹിന്ദി ഭാഗത്തിന് ലഭിച്ചത്. തെലുഗു വേർഷന് പതിനൊന്ന് മില്യണിലധികം കാഴ്ചക്കാരേയും ലഭിച്ചു. എന്തായാലും യൂട്യൂബിനെ പിടിച്ചു കുലുക്കിയിരിക്കുകയാണ് കെജിഎഫ് രണ്ടാം ഭാഗത്തിന്റെ ട്രെയിലർ.
നായകൻ യാഷും വില്ലനായ സഞ്ജയ് ദത്തും തമ്മിലുള്ള നേർക്കു നേർ പോരാട്ടമാകും ചിത്രത്തിലെന്നു ട്രെയിലറിൽ നിന്നും വ്യക്തം. പ്രശാന്ത് നീലാണ് ചിത്രം സംവിധാനം ചെയ്യുന്നത്. 1951 മുതൽ വർത്തമാനകാലം വരെയുള്ള കഥയാണ് കെജിഎഫ് രണ്ടാം ഭാഗത്തിൽ പറയുന്നത്.
2018 ഡിസംബര്‍ 21-നാണ് ചിത്രത്തിന്റെ ആദ്യഭാഗം പുറത്തിറങ്ങിയത്. കേരളത്തിൽ പ്രദർശനത്തിനെത്തിക്കുന്നത് പൃഥ്വിരാജ് പ്രൊഡക്ഷൻസാണ്. ചിത്രം ഏപ്രിൽ 14ന് തിയറ്ററുകളിലെത്തും.
മലയാളം, ഹിന്ദി, തമിഴ്, കന്നഡ, തെലുങ്ക് ഉൾപ്പടെയുള്ള ഭാഷകളിലാകും കെജിഎഫ് 2 റിലീസ്. സഞ്ജയ് ദത്ത്, പ്രകാശ് രാജ്, രവീണ ടാൻഡൻ, ശ്രിനിഥി ഷെട്ടി, മാളവിക അവിനാശ്, ഈശ്വരി റാവു തുടങ്ങി വൻ താരനിരയാണ് രണ്ടാം ഭാഗത്തിൽ അണിനിരക്കുന്നത്. 2018 ഡിസംബർ 21നാണ് സിനിമയുടെ ആദ്യ ഭാഗം പുറത്തിറങ്ങിയത്. ചിത്രം രണ്ടാഴ്ച കൊണ്ട് 100 കോടി ക്ലബിലെത്തിയിരുന്നു. ബാഹുബലിക്ക് ശേഷം ഈ നേട്ടം കൈവരിക്കുന്ന രണ്ടാമത്തെ ചിത്രമാണ് കെജിഎഫ്. കോലാറിന്റെ സ്വർണഖനിയുടെ പശ്ചാത്തലത്തിൽ റോക്കി എന്ന അധോലോക നായകന്റെ കഥയായിരുന്നു ആദ്യ ഭാഗത്തിൽ.
