ഷാരൂഖ് ഖാന് വൈ പ്ലസ് കാറ്റഗറി സുരക്ഷ ഏര്‍പ്പെടുത്തി മഹാരാഷ്ട്ര സര്‍ക്കാര്‍, വധഭീഷണി സന്ദേശങ്ങൾ ലഭിച്ചതിനെ തുടർന്നാണ് താരത്തിന്റെ സുരക്ഷ വർധിപ്പിച്ചത്. ജവാൻ, പഠാൻ എന്നീ ഹിന്ദി സിനിമകളുടെ റിലീസിന് പിന്നാലെ ഭീഷണി ഉണ്ടായതായി ഷാരൂഖ് ഖാൻ മഹാരാഷ്ട്ര ആഭ്യന്തരവകുപ്പിനെ അറിയിച്ചിരുന്നു. ആയുധധാരികളായ ആറ് സുരക്ഷാ ജീവനക്കാര്‍ താരത്തിനൊപ്പം സുരക്ഷയ്‍ക്കായി ഇനി ഉണ്ടാകും.
കളക്ഷനില്‍ ജവാൻ കുതിപ്പ് തുടരുകയാണ്. ഇന്ത്യയില്‍ മാത്രം ജവാൻ 619.92 കോടി രൂപയാണ് നേടിയെന്നാണ് ബോക്സ് ഓഫീസ് റിപ്പോര്‍ട്ട്. ഹിന്ദിയില്‍ ജവാൻ നേടിയത് 59.89 കോടി രൂപയും മറ്റ് ഭാഷകളില്‍ ഷാരൂഖ് ഖാൻ ചിത്രം 59.89 കോടി രൂപയും നേടി. വിദേശത്ത് ഷാരൂഖിന്റെ ജവാൻ 369.90 കോടി രൂപയാണ് നേടിയത്.
വിദേശത്തും ഷാരൂഖ് ഖാന്റെ ജവാൻ കളക്ഷൻ റെക്കോര്‍ഡുകള്‍ തിരുത്തിയിരുന്നുവെന്നാണ് ബോക്സ് ഓഫീസ് റിപ്പോര്‍ട്ടുകള്‍. മിഡില്‍ ഈസ്റ്റില്‍ 100 കോടി 33 ലക്ഷത്തിലധികം നേടിയിരിക്കുകയാണ്. മിഡില്‍ ഈസ്റ്റില്‍ ഒരു ഇന്ത്യൻ സിനിമയുടെ റെക്കോര്‍ഡാണ് ജവാൻ നേടിയിരിക്കുന്നത് എന്നാണ് വ്യക്തമായിരിക്കുന്നത്. ആഗോള ബോക്സ് ഓഫീസില്‍ ഷാരൂഖ് ചിത്രം ജവാൻ അത്ഭുതങ്ങള്‍ സൃഷ്‍ടിക്കുകയാണെന്നാണ് റിപ്പോര്‍ട്ട്.
തമിഴ് ഹിറ്റ്‍മേക്കര്‍ അറ്റ്‍ലിയുടെ ഹിന്ദി ചിത്രം വൻ വിജയമാണ് നേടിക്കൊണ്ടിരിക്കുന്നത്. ഷാരൂഖ് ഖാന്റെ നായികയായി നയൻതാരയും ചിത്രത്തില്‍ മികച്ച പ്രകടനം നടത്തി. ഇതാദ്യമായിട്ടാണ് നയൻതാര ഒരു ബോളിവുഡ് ചിത്രത്തില്‍ നായികയായി വേഷമിടുന്നതും. ഷാരൂഖ് ഖാൻ നായകനാകുന്ന പതിവ് സിനിമകളില്‍ നിന്ന് വ്യത്യസ്‍തമായി രാഷ്‍ട്രീയ സന്ദേശം പകരുന്നതുമാണ് ജവാൻ. ജവാനില്‍ വിജയ് സേതുപതിയാണ് വില്ലനായി എത്തിയത്. സഞ്‍ജയ് ദത്ത് അതിഥി വേഷത്തിലുണ്ടായിരുന്നു. ഷാരൂഖ് ഖാൻ നായകനായ ഹിറ്റ് ചിത്രത്തില്‍ ദീപിക പദുക്കോണ്‍, സന്യ മല്‍ഹോത്ര, സുനില്‍ ഗ്രോവര്, റിദ്ധി ദോഗ്ര, സഞ്‍ജീത ഭട്ടാചാര്യ, ഗിരിജ, ഇജാസ് ഖാൻ, കെന്നി, ജാഫര്‍ സാദിഖ് തുടങ്ങി ഒട്ടേറെ താരങ്ങള്‍ വേഷമിട്ടു.
