തന്റെ പാട്ടുകളിലൂടെ തെന്നിന്ത്യ ഇളക്കി മറിച്ച സംഗീത സംവിധായകനും ഗായകനുമാണ് സായ് അഭ്യങ്കര്. സായ് മലയാളത്തില് അരങ്ങേറ്റം കുറിച്ചിരിക്കുകയാണ്. ഷെയ്ന് നിഗം നായകനായ ബള്ട്ടിയിലൂടെയാണ് സായ് അഭ്യങ്കര് മലയാളത്തിലെത്തുന്നത്. ഉണ്ണി ശിവലിംഗം സംവിധാനം ചെയ്ത ചിത്രം ബോക്സ് ഓഫീസിലെത്തിയത് കഴിഞ്ഞ ദിവസമാണ്. മികച്ച പ്രതികരണങ്ങളാണ് ചിത്രത്തിന് ലഭിക്കുന്നത്.
ബള്ട്ടിയിലെ പാട്ടുകളൊരുക്കാന് സായ് അഭ്യങ്കര്ക്ക് ലഭിച്ചത് മലയാളത്തില് ഇതുവരെ ഒരു സംഗീത സംവിധായകന് ലഭിച്ച ഏറ്റവും ഉയര്ന്ന പ്രതിഫലമാണ്. ബള്ട്ടിയുടെ നിര്മാതാവ് സന്തോഷ് ടി കുരുവിളയാണ് ഇക്കാര്യം വെളിപ്പെടുത്തിയത്. 20 കാരനായ സായ്ക്ക് ബള്ട്ടിയ്ക്കായി താന് നല്കിയത് രണ്ട് കോടി രൂപയാണെന്നാണ് അദ്ദേഹം വെളിപ്പെടുത്തിയിരിക്കുന്നത്.
സായ്ക്ക് ഇത്രയും ഉയര്ന്ന പ്രതിഫലം നല്കാന് കാരണം അദ്ദേഹത്തിന്റെ മ്യൂസിക് വിഡിയോകളാണെന്നാണ് സന്തോഷ് ടി കുരുവിള പറയുന്നത്. സായ് ചെയ്ത മ്യൂസിക് വിഡിയോകള് വന് വിജയമായിരുന്നു. രണ്ടും മൂന്നും കോടി വ്യൂസ് നേടാന് അവയ്ക്ക് സാധിച്ചിട്ടുണ്ട്. അതിനാല് സായ്ക്ക് തന്റെ സിനിമയിലെ പാട്ടുകളും ഹിറ്റാക്കാനാകുമെന്ന് തോന്നിയെന്നാണ് അദ്ദേഹം പറയുന്നത്. ബള്ട്ടിയ്ക്കായി സായ് ഒരുക്കിയ ജാലക്കാരി നേടിയ സ്വീകാര്യതയും അദ്ദേഹം ചൂണ്ടിക്കാണിക്കുന്നുണ്ട്.
ഷെയ്ന് നിഗത്തിന്റെ 25-ാമത്തെ ചിത്രമാണ് ബള്ട്ടി. മലയാളത്തിലും തമിഴിലുമായിട്ടാണ് സിനിമ പുറത്തിറങ്ങിയത്. ചിത്രത്തിന്റെ ഹിന്ദി പതിപ്പും പ്ലാനിലുണ്ട്. ശാന്തനു ഭാഗ്യരാജ്, പ്രീതി അസ്റാനി, അല്ഫോണ്സ് പുത്രന്, ശെല്വരാഘവന് തുടങ്ങിയവരും ചിത്രത്തില് പ്രധാന വേഷങ്ങളിലെത്തുന്നുണ്ട്.
