നവാഗതനായ വീര സംവിധാനം ചെയ്യുന്ന, ഷെയിന് നിഗം നായകനാകുന്ന ‘ഹാല്’ സിനിമയുടെ മനോഹരമായ റിലീസ് അനൗണ്സ്മെന്റ് പോസ്റ്റര് പുറത്തിറങ്ങി. സെപ്റ്റംബര് 12നാണ് സിനിമയുടെ വേള്ഡ് വൈഡ് റിലീസ്. പരസ്പരം പ്രണയിക്കുന്നവരുടെ സ്വപ്നങ്ങളിലെ ദൃശ്യങ്ങള് പോലൊരു രംഗമാണ് പോസ്റ്ററില് അവതരിപ്പിച്ചിരിക്കുന്നത്. ഷെയിന് നിഗത്തിന്റെ കരിയറിലെ തന്നെ ബിഗ് ബഡ്ജറ്റ് ചിത്രമായി എത്തുന്ന ‘ഹാല്’ സിനിമയില് സാക്ഷി വൈദ്യയാണ് നായികയായി എത്തുന്നത്.
ജോണി ആന്റണി, നത്ത്, വിനീത് ബീപ്കുമാര്, കെ. മധുപാല്, സംഗീത മാധവന് നായര്, ജോയ് മാത്യു, നിഷാന്ത് സാഗര്, നിയാസ് ബെക്കര്, റിയാസ് നര്മകാല, സുരേഷ് കൃഷ്ണ, രവീന്ദ്രന്, സോഹന് സീനുലാല്, മനോജ് കെ.യു, ഉണ്ണിരാജ, ശ്രീധന്യ തുടങ്ങിയവരും ചിത്രത്തില് ശ്രദ്ധേയ വേഷങ്ങളില് എത്തുന്നുണ്ട്. മലയാളത്തിന് പുറമെ ഹിന്ദി, തെലുങ്ക്, തമിഴ്, കന്നഡ എന്നീ ഭാഷകളിലായി ഒരേ സമയം റിലീസ് ചെയ്യുന്ന ചിത്രം ഒരു കംപ്ലീറ്റ് കളര്ഫുള് എന്റര്ടെയ്നര് ആയിരിക്കുമെന്നാണ് സൂചന. ബോളിവുഡിലെ ശ്രദ്ധേയ ഗായകന് അങ്കിത് തിവാരി മലയാളത്തിലേക്ക് ആദ്യമായി എത്തുന്ന സിനിമ കൂടിയാണിത്.
സിനിമയുടെ ഫസ്റ്റ് ലുക്കും മോഷന് പോസ്റ്ററും പാട്ടും അടുത്തിടെ പുറത്തിറങ്ങിയിരുന്നത് ശ്രദ്ധേയമായിരുന്നു. 90 ദിവസമാണ് ഹാലിന്റെ ചിത്രീകരണം നീണ്ടുനിന്നത്. സംഗീതത്തിന് പ്രാധാന്യം നല്കി എത്തുന്ന ചിത്രം ജെ വി ജെ പ്രൊഡക്ഷന്സിന്റെ ബാനറിലാണ് ഒരുങ്ങുന്നത്. ഹാലിന്റെ രചന നിര്വഹിച്ചിരിക്കുന്നത് നിഷാദ് കോയയാണ്. ഓര്ഡിനറി, മധുര നാരങ്ങ, തോപ്പില് ജോപ്പന്, ശിക്കാരി ശംഭു എന്നീ ചിത്രങ്ങള്ക്ക് ശേഷം നിഷാദ് കോയ രചന നിര്വഹിക്കുന്ന സിനിമയാണ് ‘ഹാല്’. തിങ്ക് മ്യസിക്കാണ് മ്യൂസിക് പാര്ട്നര്.
