മഞ്ഞുമ്മൽ ബോയ്സ് എന്ന ഒരൊറ്റ സിനിമ കൊണ്ട് പാൻ ഇന്ത്യൻ സംവിധായകനായി മാറിയ ചിദംബരം ബോളിവുഡിൽ അരങ്ങേറ്റം കുറിക്കാൻ ഒരുങ്ങുകയാണ്. ബോളിവുഡിലെ ശ്രദ്ധേയ നിര്‍മ്മാണ കമ്പനിയായ ഫാന്‍റം സ്റ്റുഡിയോസാണ് ചിദംബരത്തിന്റെ ചിത്രം നിർമിക്കാനൊരുങ്ങുന്നത്.
മധു മണ്ടേന, അനുരാഗ് കശ്യപ്, വികാസ് ബാല്‍, വിക്രമാദിത്യ മോട്‍വാനെ തുടങ്ങിയവര്‍ ചേര്‍ന്ന് 2010 ല്‍ ആരംഭിച്ച നിര്‍മ്മാണ കമ്പനിയാണ് ഫാന്‍റം സ്റ്റുഡിയോസ്. ലൂടെര, ക്വീന്‍, അഗ്ലി, എന്‍എച്ച് 10, മസാന്‍, ഉഡ്താ പഞ്ചാബ്, രമണ്‍ രാഘവ് 2.0, ട്രാപ്പ്ഡ് തുടങ്ങിയ നിരവധി ശ്രദ്ധേയ ചിത്രങ്ങളും വെബ് സീരീസുകളും നിര്‍മ്മിച്ചിട്ടുള്ള ബാനര്‍ ആണ് ഫാന്‍റം സ്റ്റുഡിയോസ്.
അതേസമയം, തന്റെ രണ്ടാം ചിത്രത്തിൽ തന്നെ മോളിവുഡിൽ ചരിത്രം സൃഷ്ടിക്കാൻ സാധിച്ച സംവിധായകനാണ് ചിദംബരം. 200 കോടി കളക്ഷൻ നേടിയ മഞ്ഞുമ്മൽ ബോയ്സ് മലയാളത്തിലെ എക്കാലത്തെയും മികച്ച പണംവാരി പടമാണ്. നിലവിലെ റെക്കോർഡുകൾ എല്ലാം തകർത്തുകൊണ്ട് മുന്നേറിയ ചിത്രം തമിഴിൽ നേടിയത് ഐതിഹാസിക കുതിപ്പാണ്.
