തരിശ് ഭൂമിയിൽ നൂറ് മേനി വിളയിച്ച് സുലൈമാൻ മുരിക്കഞ്ചേരി.
പനമരം:
തരിശായി കിടക്കുന്ന ഭൂമിയിൽ നൂറ് മേനി വിളയിക്കാൻ കർഷകരെ സഹായിക്കുകയാണ് പനമരത്തെ ബിസിനസ്സുകാരനായ മുരിക്കഞ്ചേരി സുലൈമാൻ . പരീക്ഷണാടിസ്ഥാനത്തിൽ മുക്കാൽ ഏക്കർ സ്ഥലത്ത് നടത്തിയ പച്ചക്കറി കൃഷി വിജയമായതോടെയാണ് കൂടുതൽ കർഷകരെ സഹായിക്കാൻ സുലൈമാൻ താൽപ്പര്യമെടുക്കുന്നത്.
കഴിഞ്ഞ കുറേ വർഷങ്ങളായി അടക്ക പാട്ടമെടുത്തും മറ്റ് കച്ചവടങ്ങൾ ചെയ്തും ജീവിക്കുന്നയാളാണ് സുലൈമാൻ. കൃഷിയോടുള്ള വല്ലാത്ത അഭിനിവേശം മൂലമാണ് പനമരം കരിമ്പുമ്മലിൽ തരിശായി കിടന്ന മുക്കാൽ ഏക്കർ വയലിൽ പച്ചക്കറി ചെയ്യാനാരംഭിച്ചത്, വഴുതന, പച്ചമുളക്, തക്കാളി എന്നിവക്ക് ശരാശരി വിളവ് ലഭിച്ചതോടെ മനസ്സിന് സന്തോഷമായി. തുള്ളി നനയും സ്പ്രിംഗ്ളർ ഉപയോഗിച്ചുള്ള ജലസേചനവും ജൈവവള പ്രയോഗവുമാണ് വിളവ് വർദ്ധിപ്പിച്ചെതെന്ന് സുലൈമാൻ സാക്ഷ്യപ്പെടുത്തുന്നു.
കൃഷിക്ക് പണച്ചിലവിനായി ബുദ്ധിമുട്ടുന്നവരെ സഹായിക്കുക എന്ന ലക്ഷ്യത്തോടെ കൂടുതൽ പ്രദേശത്തേക്ക് കൃഷി വ്യാപിപ്പിക്കാനാണ് ഒരുങ്ങുന്നത്. തരിശ് ഭൂമി ധാരാളമുള്ള പനമരം പ്രദേശത്ത് സുലൈമാൻ്റെ ശ്രമങ്ങൾ മറ്റ് കർഷകർക്ക് മാതൃകയാണെന്ന് പൊതുപ്രവർത്തകനായ സിറാജ് പറഞ്ഞു.
അടക്ക പാട്ടം പ്രധാന ബിസിനസ് ആയതിനാൽ അടക്കതൊണ്ടും ചാണകവും ഉപയോഗിച്ചുള്ള ജൈവ വള നിർമ്മാണം കൃഷിക്ക് നന്നായി ഉപകരിക്കാറുണ്ട്.
വിഷരഹിതമായ പച്ചക്കറി ആളുകൾക്ക് നൽകുന്നതിനൊപ്പം കർഷകർക്ക് തന്നാലാവും വിധം ഒരു കൈ സഹായവുമാണ് ഈ കൃഷി കൊണ്ട് സുലൈമാൻ ലക്ഷ്യം വെക്കുന്നത്.
