പനമരം: കായിക അധ്വാപകന് വധഭീഷണിയെന്ന് പരാതി. പനമരം ഗവ.എച്ച്എസ്എസിലെ കായിക അധ്യാപകനും, പനമരം സ്പോർട്ടോ എഫ്.സിയുടെ കോച്ചുമായ മുഹമ്മദ് നവാസിനാണ് മലപ്പുറത്ത് വെച്ച് നടക്കുന്ന സംസ്ഥാന തല സുബ്രദോ മുഖർജി ചാമ്പ്യൻഷിപ്പിൽ പങ്കെടുക്കുന്നതുമായി ബന്ധപ്പെട്ട് വധഭീഷണിയുള്ളതായി ആരോപിക്കുന്നത്. ഇതുമായി ബന്ധപ്പെട്ട് ക്ലബ് ഭാരവാഹികൾ ജില്ലാ പോലീസ് മേധാവിക്ക് പരാതി നൽകിയിട്ടുണ്ട്. വയനാട് ജില്ലാ തല സുബ്രദോ മുഖർജി കപ്പിൽ പനമരം സ്കൂളിനായി സ്പോർട്ടോ ക്ലബ് അംഗങ്ങളെ ഉൾപ്പെടുത്തിയ ടീമായിരുന്നു ജേതാക്കളായത്. മലയാളി കുട്ടി താരങ്ങൾക്ക് പുറമെ നിയമ പ്രകാരം ഇതര സംസ്ഥാനങ്ങളിൽ നിന്നുള്ള വിദ്യാർത്ഥികളാണ് ടീമിനായി അന്ന് മാറ്റുരച്ചത്. മത്സര സമയത്ത് തദ്ദേശിയരായ കുട്ടികളെ പരിഗണിക്കാതെ ഇതര സംസ്ഥാനത്തെ കുട്ടികളെ മാനദണ്ഡങ്ങൾ പലതും പാലിക്കാതെ ടീമിൽ ഉൾപ്പെടുത്തി കളിപ്പിച്ചതായി ആരോപണമുയർന്നിരുന്നു. ഇതിന്റെ തുടർച്ചയായാണ് മലപ്പുറത്ത് മത്സരത്തിനായി വന്നാൽ വധിക്കുമെന്ന ഭീഷണി ഉയരുന്നത്.
