ഗംഭീര മേക്കിങിനൊപ്പം ഫഹദ് ഫാസിലിന്റെ അതി ഗംഭീര പ്രകടനം കൂടിയാണ് മാലിക് ഇത്രമാത്രം ചർച്ചയാകാൻ കാരണം. ഓരോ സിനിമകളിലും ഒന്നിനൊന്ന് മികച്ച പ്രകടനം നടത്തുന്ന ഫഹദ് തമിഴ്, തെലുങ്ക് ഭാഷകളിൽ കൂടി നിറയുകയാണ്. കമൽഹാസൻ ചിത്രത്തിലും അദ്ദേഹം പ്രധാനവേഷത്തിലെത്തുന്നുണ്ട്. ഇതിന് പിന്നാലെ താരത്തെ പ്രശംസിച്ച് അന്താരാഷ്ട്ര മാധ്യമമായ അൽജസീറയും രംഗത്തെത്തി. മലയാള സിനിമയുടെ നവതരംഗത്തിലെ പ്രധാനിയെന്നാണ് ഫഹദിനെ അല്‍ജസീറ വിശേഷിപ്പിച്ചിരിക്കുന്നത്.മാലിക്കിലെ പ്രകടനവും സമീപകാലത്ത് ഫഹദിന്റെ താരമൂല്യം ഉയർത്തിയ ചിത്രങ്ങളും അത് നേടിയ വിജയവും ചേർത്ത് വച്ചാണ് അൽജസീറയിലെ ലേഖനം.
മഹേഷ് നാരായണൻ–ഫഹദ് ഫാസിൽ കൂട്ടുകെട്ടിന്റെ ‘മാലിക്’ ഒടിടി റിലീസ് ആയിട്ടാണ് പ്രേക്ഷകർക്കു മുന്നിലെത്തിയത്. മാലിക് തിയറ്ററുകളിൽ കാണേണ്ടിയിരുന്ന ചിത്രമായിരുന്നുവെന്നും മഹേഷ് നാരായാണന്റെ ഏറ്റവും മികച്ച വർക്ക് ആണ് മാലിക്കിലേതെന്നും ആസ്വാദകർ അഭിപ്രായപ്പെടുന്നു.2020 ഈദ് റിലീസ് ആയി തിയറ്ററുകളിലെത്തിക്കാൻ പദ്ധതിയിട്ട ചിത്രമാണ് മാലിക്. എന്നാൽ കോവിഡ് നിയന്ത്രണങ്ങൾ കടുത്തതോടെ റിലീസ് പ്രതിസന്ധിയിലായി. അങ്ങനെയാണ് ചിത്രം ഒടിടി റിലീസ് ചെയ്യാൻ അണിയറ പ്രവർത്തകർ നിർബന്ധിതരാകുന്നത്.
