കൊച്ചി: ‘അമ്മ’യിൽ നിന്നും രാജിവച്ച നടി പാര്‍വതി തിരുവോത്തിനെ അഭിനന്ദിച്ച്‌ സംവിധായകനും ഗാനരചയിതാവുമായ ശ്രീകുമാരന്‍ തമ്പി. അദ്ദേഹത്തിന്‍റെ അഭിനന്ദനം ഫേസ്ബുക്ക് കുറിപ്പിലൂടെയായിരുന്നു.
ഒട്ടും അര്‍ഹതയില്ലാതെ ഒരു പ്രധാന സ്ഥാനത്തെത്തിയ ‘എക്സ്ട്രാ നടന്‍റെ’ കളിതമാശയായി വേണമെങ്കില്‍ പാര്‍വതിക്ക് അയാളുടെ അഭിപ്രായത്തെ തള്ളിക്കളയാമായിരുന്നുവെന്നും ‘അല്‍പ്പന് ഐശ്വര്യം വന്നാല്‍ അര്‍ദ്ധരാത്രിക്കു കുട പിടിക്കും’ എന്നാണല്ലോ പഴമൊഴിയെന്നും അങ്ങനെ ചെയ്യാതെ നടികളുടെ അഭിമാനം നിലനിര്‍ത്തിയതാണ് പാര്‍വ്വതിയുടെ മേന്മ എന്നും ശ്രീകുമാരന്‍ തമ്പി പറഞ്ഞു.
ഇന്നത്തെ മലയാളസിനിമയിലെ സമാനതകളില്ലാത്ത നടിയാണ് പാര്‍വ്വതി എന്ന് ചാര്‍ളി, എന്ന് നിന്‍റെ മൊയ്തീന്‍, ടേക് ഓഫ്, ഉയരെ, ഗരിബ് ഗരിബ് സിംഗിള്‍ എന്നീ സിനിമകളിലെ പാര്‍വ്വതിയുടെ അഭിനയം കണ്ട തനിക്ക് ധൈര്യമായി പറയാന്‍ കഴിയുമെന്നും അദ്ദേഹം വ്യക്തമാക്കി.രാജിവയ്ക്കാന്‍ തന്റേടം കാണിച്ച മികച്ച അഭിനേത്രിയായ പാര്‍വ്വതി തിരുവോത്തിനെ താൻ അഭിനന്ദിക്കുന്നുവെന്നും അഭിനയജീവിതത്തില്‍ തല്‍പ്പര കക്ഷികളുടെ സംഘടിതമായ എതിര്‍പ്പുമൂലം, ഒരുപക്ഷേ, ഭൗതിക നഷ്ടങ്ങള്‍ ഉണ്ടായേക്കാം എന്നറിഞ്ഞിരുന്നും ഇങ്ങനെയൊരു ധൈര്യം കാണിച്ച ഈ കലാകാരിയില്‍ നിന്നാണ് യഥാര്‍ത്ഥ സ്ത്രീത്വം എന്താണെന്ന് നമ്മുടെ സിനിമാരംഗത്തെ കലാകാരികള്‍ തിരിച്ചറിയേണ്ടതെന്നും ശ്രീകുമാരന്‍ തമ്പി പറഞ്ഞു.
