കോറോം: കാലവര്‍ഷക്കെടുതി രൂക്ഷമായിക്കൊണ്ടിരിക്കുന്ന വയനാട്ടില്‍ മാതൃകാ പ്രവര്‍ത്തനവുമായി പോലീസ് രംഗത്ത്. നിരവില്‍പ്പുഴ മാനന്തവാടി പ്രധാന നിരത്തില്‍ മറിഞ്ഞു വീണ മരം ഫയര്‍ഫോഴ്‌സ് വരുന്നത് വരെ കാത്തു നില്‍ക്കാതെ മുറിച്ചുനീക്കി തൊണ്ടര്‍നാട് എസ്.ഐ ജയപ്രകാശും സംഘവുമാണ് മാതൃകയായത്. കൂടാതെ പരിസരത്ത് അപകട ഭീഷണി ഉയര്‍ത്തി നിന്ന മറ്റൊരു മരവും പോലീസ് സംഘം നാട്ടുകാരുടെ സഹായത്തോടെ മുറിച്ചുനീക്കി. പോലീസിന്റെ പ്രവൃത്തി ഏറെ മാതൃകാപരമായെന്ന് നാട്ടുകാര്‍ പറഞ്ഞു. കോവിഡ് കാലം തുടങ്ങിയതു മുതൽ വിവിധങ്ങളായ ശ്രദ്ധേയ പ്രവർത്തനങ്ങൾക്കു നേതൃത്വം നൽകുന്ന തൊണ്ടർനാട് പോലീസ് ഇതിനകം നാട്ടുകാരുടെ പ്രിയപെട്ടവരായി തീർന്നിരിക്കുകയാണ്.
