‘പൊട്ടാ , കാർഡിയാക് അറസ്റ്റ് എന്ന് പറയണം’

ഭാഗീരഥീ നിമജ്ജനം….

വയൽ നടുവിൽ വടക്കേ വീട്ടിലെ
ഭാഗീരഥി മുത്തശ്ശി മരിച്ചു ….
മക്കളെല്ലാം ദൂരെ ദൂരെ …..
മൊബൈൽ ഫ്രീസറിന്റെ
തണുപ്പേറ്റ്
ഭാഗീരഥി മുത്തശ്ശി
മക്കളെ കാത്തു കിടന്നു….

കോഴി ഫാം മുതലാളിയായ
ഇളയവൻ പറഞ്ഞു :
” അമ്മയ്ക്ക് നെഞ്ചുവേദന
ഉണ്ടായിരുന്നു ” ….
ഉഗാണ്ടയിൽ ഡോക്ടറായ
മൂത്തവൾ പറഞ്ഞു :
” പൊട്ടാ , കാർഡിയാക് അറസ്റ്റ്
എന്ന് പറയണം …
വെറുതെയല്ല നീ
പത്തിൽ തോറ്റ്
കോഴി മുതലാളി ആയത് …. “
രണ്ടാമത്തെയും
മൂന്നാമത്തെയും മക്കൾ
പഴയ സ്വത്തു പങ്കിടൽ
വൈരാഗ്യത്തിന്
പരസ്പരം തുറിച്ചുനോക്കി….

പതിനാറാം ദിവസത്തിൻറെ ചടങ്ങ്
മക്കളുടെ തിരക്കുകാരണം
അഞ്ചാം ദിവസം ഒപ്പിച്ചു തീർത്തു .
തർക്കം പിന്നെയും വന്നു :
ചിതാഭസ്മം എവിടെ ഒഴുക്കണം ?
ഒടുവിൽ പല സ്ഥലങ്ങൾ
എഴുതി നറുക്കിട്ടു .
തിരുനാവായ എന്നെഴുതിയ
തുണ്ടുകിട്ടി .
ഹിന്ദുച്ചെക്കൻ ഓടിക്കുന്ന
ട്രാവലർ ഏർപ്പാടാക്കി
പെണ്ണുങ്ങൾ
കഴുത്തിലെ മാല കാണുന്ന
സെറ്റ് സാരിയും
ആണുങ്ങൾ കസവുമുണ്ടും
വാങ്ങിച്ചു .

ഭസ്മം ഒഴുക്കുന്നതിന്റെ
തലേന്നാൾ ട്രാവലർ പുറപ്പെടുമ്പോൾ
ചായക്കട നടത്തുന്ന
നാരാണേട്ടൻ കാറിത്തുപ്പി :

” ത്‌ഥൂ …. ജീവിച്ചിരിക്കുമ്പം
വെറും അയ്മ്പത്
കിലോമീറ്റർ ദൂരെയുള്ള
പറശിനിക്കടവിൽ ഒന്ന്
കൊണ്ടുപോയി മുത്തപ്പനെ തൊഴുവിക്കണമെന്ന്
ഭാഗീരഥി ഏടത്തി പറഞ്ഞിട്ട്
നായിൻറെ മക്കൾക്ക്
അതിന് നേരം ഉണ്ടായില്ല .
എന്നിട്ടിപ്പം കത്തിച്ചു ചാമ്പലാക്കി
300 കിലോമീറ്റർ അപ്പുറത്തുള്ള
തിരുനാവായയിൽ
ഒലിപ്പിക്കാൻ
കൊണ്ടുപോകുന്നു “

അപ്പോൾ ട്രാവലർ
ഗ്രാമത്തിലെ ഓട്ടോറിക്ഷക്കാരൻറെ
അണ്ണാക്കിൽ ചെളി തെറിപ്പിച്ച്
തിരുനാവായക്ക്
കുതിക്കുകയായിരുന്നു— ജിത്തു തമ്പുരാൻ Jithu Thampuran