നവീനിനും ജാനകിക്കുമെതിരേ വിദ്വേഷം പ്രചരിപ്പിച്ചവർ അറിയണം… ആരാണ് റാസ്പുട്ടിൻ ?
‘റാ റാ റാസ്പുട്ടിന് ലവര്‍ ഓഫ് ദ റഷ്യന്‍ ക്വീന്‍…’ എന്ന പാട്ടിനു ചുവടുവച്ച ജാനകി എം ഓംകുമാറും നവീൻ കെ റസാക്കും അവർക്ക് നേരിടേണ്ടിവന്ന വിദ്വേഷ പ്രചാരങ്ങളുമാണ് ഇന്ന് ചർച്ചാ വിഷയം.
ബോണി എം എന്ന ജര്‍മന്‍ ബാന്റ്, ടര്‍ക്കിഷ് നാടന്‍ പാട്ടിന്റെ താളത്തില്‍ പോളണ്ടില്‍ ചിത്രീകരിച്ച, റാസ്പുട്ടിന് എന്ന റഷ്യൻ ആൾദൈവത്തെ കുറിച്ചുള്ള ഇംഗ്ലീഷ് പാട്ടിന് ചുവടുവയ്ക്കുന്ന രണ്ട് വിദ്യാര്‍ഥികളെ മതത്തിന്റെ അടിസ്ഥാനത്തിൽ മാത്രം കാണാന്‍ കഴിയുന്ന വര്‍ഗ്ഗീയവാദികൾക്ക് സോഷ്യൽ മീഡിയ ശക്തമായ മറുപടിയാണ് നൽകുന്നത്.
ഇതിനൊപ്പംതന്നെ നവീനിന്റെയും ജാനകിയുടെയും നൃത്തം കുറേപേരെയെങ്കിലും റഷ്യക്കാരൻ ഗ്രിഗറി റാസ്പുട്ടിനെയും, ബോണി എം- ന്റെ റാസ്പുട്ടിനെയും ഓർമപ്പെടുത്തുന്നു. വര്‍ഗീയവിദ്വേഷം പ്രചരിപ്പിക്കുന്നവര്‍ക്കിടയില്‍ അത് സൃഷ്ടിച്ച അസ്വസ്ഥത മറ്റൊരു ചരിത്രത്തെയും അതിലെ അന്തര്‍നാടകങ്ങളെയും ഓര്‍മിപ്പിക്കുന്നു. അറിയാം ആരാണ് റാസ്പുട്ടിൻ എന്ന്….
പത്തൊമ്പതാം നൂറ്റാണ്ടിൽ റഷ്യയിൽ ജീവിച്ചിരുന്ന ആൾദൈവമായിരുന്നു ഗ്രിഗറി റാസ്പുട്ടിൻ. സൈബീരിയയിലെ പൊക്രോവ്സ്‌കി എന്ന ടൗണിലായിരുന്നു റാസ്പുട്ടിന്റെ ജനനം. യുവാവായിരുന്ന റാസ്പുട്ടിൻ കടുത്ത മദ്യപാനിയായിരുന്നെങ്കിലും വെളിപാടിനുവേണ്ടി കൊതിച്ചുകൊണ്ടിരുന്ന ഒരു ശുഭാപ്തിവിശ്വാസി കൂടിയായിരുന്നു.
ഇടയ്ക്കിടെ അദ്ദേഹത്തിന് ദിവ്യദർശനങ്ങൾ ഉണ്ടാകുമായിരുന്നു. ഖൈലിസ്റ്റി എന്ന സന്യാസസമൂഹത്തിൽ ചേർന്നെങ്കിലും റാസ്പുടിന്റെ നിലപാടുകളും സന്യാസസമൂഹത്തിന്റെ വിശ്വാസപ്രമാണങ്ങളും ഒത്തുപോയില്ല. അതിനാൽ സന്യാസം വിട്ടു.
തിരിച്ചെത്തിയ ശേഷം 19ാം വയസ്സിൽ പ്രോസ്കോവ്യ ഡുബ്രോവിന എന്ന റഷ്യൻ പെൺകുട്ടിയെ വിവാഹം കഴിച്ചു. അതിൽ നാലു കുട്ടികളുമുണ്ടായി. എന്നാൽ കുടുംബജീവിതത്തിൽ ഉറച്ചു നിന്നു ജീവിക്കാൻ റാസ്പുടിൻ ഒരുക്കമായിരുന്നില്ല.
കുറച്ചു കാലത്തിനു ശേഷം വീടുവിട്ടിറങ്ങി ഗ്രീസിലെ അഥോസ് പർവതത്തിലേക്കും ഏഷ്യയിലേക്കുമൊക്കെ റാസ്പുടിൻ ഏകാന്തസഞ്ചാരങ്ങൾ നടത്തി. തിരിച്ചെത്തിയ റാസ്പുടിൻ രോഗികളെ സുഖപ്പെടുത്താൻ കഴിവുള്ള ദിവ്യനായി സ്വയം പ്രഖ്യാപിച്ചു.
റഷ്യയിൽ പലമേഖലകളിൽ അലഞ്ഞു തിരിഞ്ഞ ശേഷം 1903ൽ അക്കാലത്ത് റഷ്യയുടെ തലസ്ഥാനമായിരുന്നു സെന്റ് പീറ്റേഴ്സ് ബർഗിൽ എത്തി. സാർ നിക്കോളാസ് രണ്ടാമനും പത്നി അലക്സാൻഡ്രയുമായിരുന്നു അന്നത്തെ റഷ്യൻ ചക്രവർത്തിയും മഹാറാണിയും.
മുറിവുകൾ സംഭവിക്കുമ്പോൾ രക്തം കട്ട പിടിക്കാതെ നിരന്തരമായി ഒഴുകുന്ന അവസ്ഥയായ ഹീമോഫീലിയ എന്ന ജനിതക അസുഖം മൂലം വിഷമിക്കുകയായിരുന്നു കുടുംബം. തന്റെ മകൻ അലക്‌സിക്കും അസുഖം പിടിപെട്ടതിൽ അലക്സാൻഡ്ര ഏറെ വിഷമിച്ചിരുന്നു.
മകന്റെ അസുഖം ചികിൽസിച്ചു ഭേദമാക്കാനായി റഷ്യയിലെ പല ഡോക്ടർമാരെയും രാജാവും റാണിയും സമീപിച്ചെങ്കിലും വലിയ പുരോഗതിയുണ്ടായിരുന്നില്ല. അങ്ങനെയാണ് റാസ്പുടിനുമായി രാജകുടുംബം പരിചയത്തിലാകുന്നത്. തന്റെ മകനെ രക്ഷിക്കാൻ റാസ്പുട്ടിന് സാധിക്കുമെന്ന് അലക്സാൻഡ്ര വിശ്വസിച്ചു.
1908ൽ അലക്സിക്ക് ഒരു മുറിവുണ്ടാകുകയും നിലയ്ക്കാത്ത രക്തപ്രവാഹം ഉണ്ടാകുകയും ചെയ്തു. ഡോക്ടർമാർപോലും കയ്യൊഴിഞ്ഞതോടെ അലക്സാൻഡ്ര റാസ്പുട്ടിനോട് സഹായമഭ്യർത്ഥിച്ചു. വളരെ ആകസ്മികമായി അലക്സി രക്ഷപ്പെട്ടു. ഇത് അലക്സാൻഡ്രയ്ക്ക് റാസ്പുടിനിലുള്ള വിശ്വാസം വർധിപ്പിച്ചു.
അതോടെ ചക്രവർത്തിനിയുടെ മനസ്സാക്ഷി സൂക്ഷിപ്പുകാരനായി റാസ്പുട്ടിൻ മാറി. ഇതിലൂടെ റാസ്പുടിന് രാജകുടുംബത്തിനു മേലും അതുവഴി റഷ്യൻ ഭരണത്തിലും ശക്തമായ സ്വാധീനം ചെലുത്താൻ അവസരമൊരുങ്ങുകയായിരുന്നു.
പക്ഷേ, ഈ ബന്ധം റാസ്പുട്ടിന് അപഖ്യാതി സമ്മാനിക്കുകയായിരുന്നു. ‘സെക്സ് മെഷീൻ’, ‘സാറിനയുടെ രഹസ്യകാമുകൻ’ എന്നിങ്ങനെ പല പേരുകളും റാസ്പുട്ടിനു ലഭിച്ചു. 1916 ആയതോടെ രാജവംശത്തിലെ ഒരു വിഭാഗം റാസ്പുട്ടിന്റെ ഇടപെടലുകളിൽ തീർത്തും അസ്വസ്ഥരായി.
നിക്കോളാസിന്റെ അനന്തരവനായ യൂസുപോവ് രാജകുമാരൻ, അധോസഭയായ ഡ്യൂമയിലെ ഉന്നത പ്രതിനിധി വ്ലാഡ‍ിമിർ പുരിഷ്കേവിച്ച്, ഗ്രാൻഡ് ഡ്യൂക്ക് ഡിമിത്രി പാവ്‌ലോവിച്ച് എന്നിവരായിരുന്നു ഇവർ.
ഇനി റാസ്പുടിൻ ജീവനോടെയിരിക്കാൻ പാടില്ലെന്ന് അവർ തീരുമാനിച്ചു. അതിനായി ഒരു ഗൂഢാലോചന തയാറാക്കി. ഇതു പ്രകാരം ഡിസംബറിൽ തണുപ്പുള്ള ഒരു രാത്രിയിൽ അവർ റാസ്പുടിനെ യൂസുപോവിന്റെ വീട്ടിൽ വിരുന്നിനു ക്ഷണിച്ചു. എല്ലാവിധ വിഭവങ്ങളുമുള്ള ഒരു വലിയ വിരുന്നായിരുന്നു അത്.
അതിൽ റാസ്പുട്ടിന് ഏറ്റവും ഇഷ്ടമുള്ള കേക്കിൽ സയനൈഡ് ചേർത്ത് വിളമ്പിയിരുന്നു. എന്നാൽ ഇത് കഴിച്ച റാസ്പുട്ടിന് ഒന്നും സംഭവിച്ചില്ല. സയനൈഡ് കേക്ക് കൊണ്ട് കാര്യം സാധിക്കാതെ വന്നപ്പോൾ സംഘം ശേഷിച്ച സയനൈഡ്, മാഡറിന എന്ന ഒരു പ്രത്യേകതരം വീഞ്ഞിൽ കലക്കി റാസ്പുട്ടിന് നൽകി. ഇതിലും റാസ്പുട്ടിന് ജീവാപായമുണ്ടായില്ല.
റാസ്‌പുട്ടിനെ കൊല്ലാനുള്ള ശ്രമങ്ങൾ രണ്ടും പരാജയപ്പെട്ടതോടെ അക്ഷമനായ യുസുപോവ് റാസ്പുട്ടിന് നേർക്ക് വെടിയുതിർത്തു. വെടിയേറ്റ റാസ്പുടിൻ ഓടി രക്ഷപ്പെടാൻ ശ്രമിച്ചതോടെ പുരിഷ്കേവിച്ചും നിറയൊഴിച്ചു.
വയറിനു വെടിയേറ്റ റാസ്പുടിൻ മണ്ണിലേക്കു മരിച്ചുവീണു. പിന്നാലെ നേവാനദിയിൽ അവർ റാസ്പുടിന്റെ ശരീരം തള്ളുകയായിരുന്നു.
പിന്നീട് അദ്ദേഹത്തിന്റെ ശരീരം പോസ്റ്റ് മോർട്ടം നടത്തിയെങ്കിലും റാസ്പുടിന്റെ ശരീരത്തിൽ വിഷാംശം കണ്ടെത്താൻ സാധിച്ചിരുന്നില്ല. വിരുന്നിൽ റാസ്പുടിൻ വിഷം പുരട്ടിയ കേക്ക് കഴിച്ചു കാണില്ല എന്നതാണ് ഇതിനെപ്പറ്റിയുള്ള മറ്റൊരു വിശദീകരണം.
തന്റെ മരണം പോലും റാസ്പുട്ടിൻ നേരത്തെകൂട്ടി അറിഞ്ഞിരുന്നു എന്നാണ് കരുതുന്നത്. കാരണം, സാർ നിക്കോളാസ് രണ്ടാമന് ഒരിക്കൽ എഴുതിയ കത്തിൽ, താൻ ഇല്ലാതെയായാൽ അത് രാജഭരണത്തിന്റെ തന്നെ നാശത്തിനിടയാക്കും എന്ന് പറഞ്ഞിരുന്നു.
റാസ്പുട്ടിന്റെ മരണശേഷം നടന്ന 1918-ൽ സാറിസ്റ്റ് സാമ്രാജ്യം കമ്യൂണിസ്റ്റ് വിപ്ലവത്തിനു കീഴടങ്ങി. സാർ നിക്കോലാസും കുടുംബവും വധിക്കപ്പെടുകയും ചെയ്തു.
