വെള്ളമുണ്ട: നാല് പതിറ്റാണ്ടുകളിലേറെയായി വെള്ളമുണ്ടയുടെ പ്രഭാതങ്ങളെ വാർത്തകളാൽ വരവേറ്റു കൊണ്ടിരിക്കുകയാണ് പുത്തൂർ മമ്മൂട്ടിക്ക. മഴയും മഞ്ഞും കാറ്റും തണുപ്പും പേമാരിയും പ്രളയവും ഇതാ ഇപ്പോൾ കോവിഡ് മഹാമാരി വന്നിട്ടും ഒരു ദിവസം പോലും മുടങ്ങാതെ പുലർച്ചെ എഴുന്നേറ്റ് പത്ര കെട്ടുകൾ സ്വീകരിച്ചു നാട്ടുകാർക്ക് എത്തിച്ചു നൽകുന്ന ജോലിയിൽ വ്യാപൃതനാണ്. മൊബൈലും ഇന്റർനെറ്റുമില്ലാതിരുന്ന കാലത്ത് കിലോ മീറ്ററുകൾ നടന്ന് വാർത്തകൾ കൽപ്പറ്റയിലെ ബ്യൂറോകളിലെത്തിക്കുമായിരുന്ന മമ്മൂട്ടിക്ക നിറ പുഞ്ചിരിയോടെ നാട്ടുകാർക്കിടയിൽ ഇന്നും സജീവമാണ്.
